Iran fer ikki at samráðast við USA

Eingin iransk sendinevnd er farin til Pakistan at vera við í friðarsamráðingum við USA.

Tað skrivar Reuters, sum endurgevur almennar iranskar miðlar.

Fleiri altjóða miðlar hava skrivað, at iransk umboð fóru at vera við í samráðingum við USA. Men iranar avsanna hesi tíðindini. 

Almenna fráboðanin er framvegis, at Iran, sum støðan er, fer ikki til samráðingarborðið

Um ein amerikonsk sendinevnd er farin til Pakistan, er óvist, men sambært amerikanska forsetanum, fer ein sendinevnd til pakistanska høvuðsstaðin Islamabad at samráðast við Iran.

Varaforsetin við

Í morgun frættist, at amerikanski varaforsetin, J.D. Vance, verður partur av sendinevndini, sum fer til Islamabad.

Tað skrivar amerikanski miðilin, Axios.

Eftir at USA og Ísrael lupu á Iran í endanum á februar, blivu partarnir samdir um eina vápnahvíld 8. apríl.

Vápnahvíldin fer úr gildi annaðkvøld.