Málið um brot á djóravælferð er latið statsadvokatinum

Málið um sýslumannin og grindaformenninar, sum eru skuldsettir fyri bróta lógina um djóravælferð, er latið statsadvokatinum, sigur Michael Boolsen, fúti.

Meira vil hann ikki siga um tað.

Sýslumaður og grindaformenn eru skuldsettir fyri at bróta lógina um djóravælferð í einum grindadrápi í Hvannasundi í fjør summar.

Uppskotið um grind og djóravælferð, sum tingmenn úr øllum flokkum komu í tingið við fyrst í desember í fjør, er nú komið aftur hagar, men hesa ferð úr landsstýrinum.

Michael Boolsen, fúti

Nágreinar lógina

Uppskotið skal taka burtur allan iva um, at lógin um djóravælferð er ikki galdandi fyri veiðu og fiskiveiðu, millum annað grindadráp.

Talan er um nágreining í lógini. 

Tingmenninir úr øllum flokkum høvdu uppskot til samtyktar um tað, sum teir kalla at verja rættin at veiða villini djór.

Teir bóðu landsstýrið broyta lóggávuna soleiðis, at bara grindalógin er galdandi fyri grindadráp. Ikki lógin um djóravælferð.

Tað uppskotið kom ikki aftur úr vinnunevndini fyri valið, hóast freistin at koma við áliti var 10. januar.