Orkað breyt marknaðarføringarlógina

Dagføring 13. mai kl. 10:14: Brúkaraumboðið hevur nú lagt hesar upplýsingar afturat málinum, og endurgeva vit tær orðarætt her: "Málið bleiv meldað í januar 2024. Brúkaraumboðið er fyri stuttum kunnað um, at Orkað hevur rindað bótina á 30.000 kr. tann 3. apríl 2024." 

Smápartafelagið 16, sum virkar undir navninum "Orkað", breyt marknaðarføringarlógina, tá fyritøkan sendi fólki tilboð um at reinsa skorsteinin, meðan fyritøkan var í økinum. 

Tað boðar Brúkaraumboðið frá.

Brúkaraumboðið fekk tríggjar fráboðanir um, at felagið Orkað, sum Hans Jørgen Djurhuus eigur, setti seg í samband við fólk, uttan at tey høvdu biðið um tað frammanundan.

Sambært grein6 í marknaðarføringarlógini er tað ikki loyvt at senda út lýsingar við telduposti, sms-boðum ella telefon, uttan at móttakarin frammanundan hevur biðið um tað.

Skerpandi umstøður

Í ítøkiliga málinum eru tað eisini skerpandi umstøður, at fyritøkan Orkað í nøkrum førum ringdi fleiri ferðir til somu borgarar, hóast teir høvdu sagt frá, at teir ikki vilja verða uppringdir av felagnum.

Brúkaraumboðið sendi málið til fútan við áheitan um at reisa ákæru móti fyritøkuni.

Orkað hevur nú viðurkent brot á marknaðarføringarlógina, og hevur rindað 30.000 krónur í bót, upplýsir Brúkaraumboðið.