Ákæruvaldið hevur slept málinum um Galaxy

Mett verður ikki, at próvbyrðan kann lyftast, og tí verður ikki farið ikki víðari við málinum

Ákæruvaldið hevur slept málinum um hekkuportrið á Galaxy.

18.05.2026 - 08:56

Ákæruvaldið hjá politinum hevur slept skuldsetingini móti skiparanum á ferðafólkaskipinum Galaxy. Ákæruvaldið metir ikki, at próvbyrðan kann lyftast, og fer tí ikki víðari við málinum.

Sjóvinnustýrið meldaði málið til politiið í oktober í fjør og bað um, at politiið kannaði møgulig brot á reglur, sum Sjóvinnustýrið umsitur.

Grundað á tilfarið frá Sjóvinnustýrinum og kanningararbeiðið hjá politinum, hevur ákæruvaldið tikið avgerð um, at málið ikki verður sent í rættin at avgera.

Galaxy, Hekkuportur á Galaxy

Hóast tað er staðfest, at hekkuportrið var opið, metir ákæruvaldið ikki, at tað ber til at prógva, at portrið var opið við fráferð.

Orsøkin er m.a., at ákæruvaldið metir, at tað ikki ber til at prógva, at hekkuportrið á Galaxy var opið við fráferð úr Havn 1. september í fjør, hóast hekkuportrið var staðfest opið á túrinum til Suðuroyar.

Niðurstøðan hjá ákæruvaldinum er løgd fyri Sjóvinnustýrið, sum ongar viðmerkingar hevði.