Iran hevur sent USA mótuppskot

Iranska uttanríkisráðið sigur, at tað hevur svarað nýggja uppskotinum frá USA, sum miðar eftir at enda kríggið.

Talsmaðurin fyri iranska uttanríkisráðið, Esmaeil Baqaei sigur, at samskiftið millum Iran og USA heldur fram gjøgnum pakistansku semingsmenninar, og at Iran í gjárkvøldið sendi teimum eitt endurskoðað mótuppskot.

- Soleiðis sum vit kunngjørdu í gjár, hava vit sent víðari okkara stúranir um amerikanska partin, sigur hann. 

Iranskir miðlar skriva, at USA hevur sett alt ov stór krøv.

Men amerikanski forsetin, Donald Trump, er farin at ótolnast um Iran.

- Tíðin gongur undan hjá Iran, og teir eiga at skunda sær, tí annars verður einki eftir av teimum, skrivaði Trump í gjár í fráboðan á egna miðli sínum.

Loynifundur

Trump fer í morgin á fund í trygdarrúminum í Hvítu húsunum, nevnt Situation Room, skrivar Axios, sambært Reuters.

Rúmið verður nýtt, tá ið forsetin heldur serliga loyniligan fund um amerikanska verju.

Ovasta trygdarráðið í USA verður við á fundinum, skrivar Reuters.

Á skránni eru hernaðarligir valmøguleikar fyri kríggið í Iran.