Úr Asia til Føroya at giftast

Jing Hua og Muhan hava ferðast langt fyri kærleikan.

Í heimlondunum Kina og Singapor kunnu samkynd nevniliga ikki vígast, og tí er tað vanligt, at samkynd pør ferðast til evropeisk lond at giftast.

Sjálvar hava tær valt Føroyar sum staðið at siga endaliga ja til hvørja aðra, og tað er ikki heilt av tilvild.

Í fjør vitjaði Muhan Føroyar. Hon var bergtikin av oyggjunum og helt at tær vóru so mikið vakrar, at her vildi hon giftast við Jing Hua.

Hóast lógin í heimlondunum forðar teimum at gerast hjún har, so er hugburðurin millum fólk ein annar.

Sambært Jing Hua eru fólk í Singapor ógvuliga rúmlig og vælkomandi yvir fyri LGBT-felagsskapinum.

Í Kina er tað eitt sindur øðrvísi. Tey góðtaka samkynd, men tey tola ikki, at tað er sjónligt í almenna rúminum. 

Hóast Muhan og Jing Hua nú eru løgfrøðiliga giftar í Føroyum, so er hjúnabandið ikki viðurkent, tá tær eru heima aftur.

Men sambært teimum er tað ikki umráðandi. Tað er fyri kærleikan, at tær giftast, og alt hitt kemur í aðru røð.