Borgarin skal ikki liggja óhjálpin

Jon Mortensen er í løtuni á Umlættingar og Rehabilitetsdeplinum URD í Hoyvík, og hann stúrir fyri einum møguligum verkfalli á eldraøkinum.

- Eg eri øgiliga glaður fyri hjálpina her, einastandandi glaður. Fer tað at raka so nógv fólk, at tað lutvíst má lata aftur, so er tað ein skandala fyri nógv fólk, sigur 86 ára gamli borgarin m.a.

Hanne-mi á Brúgv, deildarleiðari á URD, sigur, at borgarin ikki skal liggja óhjálpin. Men alt fer at taka longri tíð. Færri fólk verða til arbeiðis, so borgarar mugu brynja seg við toli, og bert tær neyðugu uppgávurnar verða gjørdar, um verkfall verður lýst.

Størsti parturin løntur eftir sáttmála hjá Heilsuhjálparafelagnum
Elsa Johanna Høgenni, starvsfólkaleiðari í Tórshavnar kommuna greiðir frá, at høvuðsstaðarkommunan er ein stór kommuna, og at hon stendur fyri umleið 40 prosentum av øllum eldraøkinum í Føroyum.

Hon greiðir víðari frá, at kommunan hevur 212 búfólk, sum búgva á einum stovni hjá Tórshavnar kommunu, og 178 borgarar fáa heimahjálp.

Meiri enn helvtin av av starvsfólkunum á økinum eru lønt eftir sáttmálanum hjá Heilsuhjálparafelagnum.

Sí innslag úr Degi og viku við gesti.