Sjóvinnustýrið eigur at hava vegleiðing um vanlukkufráboðan á sjónum

Sjóvinnustýrið eigur at hava greiða vegleiðing á heimasíðu sínari um, hvussu boðast skal frá vanlukku á sjónum.

Tað heldur Reiðarafelagið fyri handilsskip, nú kunngerð er á veg, sum áleggur skipara og reiðara at boða Sjóvinnustýrinum frá um vanlukkur, andlát og hendingar á føroyskum ella útlendskum skipi í føroyskum sjógvi.

Tað hevði verið gott, sigur Reiðarafelagið fyri handilsskip, um greið vegleiðing verður á heimasíðu Sjóvinnustýrisins, sum sigur, hvussu slíkar fráboðanir skulu latast inn, hvørjar upplýsingar skulu vera við, møgulig fráboðanarskjøl og hvussu latið verður inn í vanligari skrivstovutíð og uttan fyri vanliga skrivstovutíð. 

Sambært uppskotinum um kunngerð skal Sjóvinnustýrið árliga boða ILO frá um andlát á skipi, sum eru fráboðað stovninum.

ILO er ST-stovnurin, sum viðger arbeiðsmarknaðin og arbeiðsumstøður.

Hevur longu vegleiðing
 

Sjóvinnustýrið hevur longu vegleiðing um vanlukkufráboðan á sínari heimasíðu.

Og har hevur hon verið í nógv ár.

Tí undrast Sjóvinnustýrið á, at Reiðarafelagið fyri handilsskip sigur, at Sjóvinnustýrið eigur at hava greiða vegleiðing á heimasíðu sínari um, hvussu boðast skal frá vanlukku á sjónum.

Hans Johannes á Brúgv, stjóri í Sjóvinnustýrinum, sigur, at stýrið á heimasíðu sínari kunnar um fráboðanarskyldu um vanlukkur. 

Har eru eisini oyðibløð.

Ein kunngerð er á veg, sum áleggur skipara og reiðara at boða Sjóvinnustýrinum frá um vanlukkur, andlát og hendingar á føroyskum ella útlendskum skipi í føroyskum sjógvi.