Lond í Evropa til reiðar at strika revsitiltøk móti Iran

Bretland, Frakland, Týskland og Italia eru til reiðar at strika galdandi revsitiltøk móti Iran, nú greiðar broytingar eru í iransku kjarnorkuætlanini.

Tað søgdu leiðararnir hesum í londunum, sum eisini verða nevnd E4, í gjárkvøldið í felags yvirlýsing, stutt eftir at bæði USA og Iran váttaðu, at londini hava gjørt friðaravtalu.

- Iran má ongantíð útvega sær kjarnorkuvápn. Vit eru til reiðar at samstarva við USA, Iran og altjóða kjarnorkustovnin IAEA um hetta, stendur í fráboðanini.

guterres.jpg

ST-aðalskrivarin fegnast eisini

ST-aðalskrivarin, António Guterres, takkar londunum, sum hava stuðlað samráðingunum, sum førdu til eina avtalu millum USA og Iran.

Í fráboðan gjøgnum talsmannin, Stéphane Dujarric, fegnast aðalskrivarin um tíðindini um friðaravtalu, sum fevnir um: Frið beinanvegin og varandi vápnahvíld, at Hormuzsundið letur uppaftur, og karmar fyri víðari samráðingum.

- Hetta er eitt avgerandi stig móti friðarligari loysn á ósemjuni, sigur ST-aðalskrivarin. 

Samstundis er aðalskrivarin takksamur fyri leiklutin, sum Pakistan, Katar, Egyptaland, Saudiarabia, Turkaland og onnur lond í økinum hava havt í samráðingunum, sum førdu til friðaravtaluna, skrivar NTB.