Smyril er ov lítil

Smyril er bivin ov lítil.

Tað sigur Dánjal Samuelsen, stjóri í Strandfaraskipum Landsins.

Tí er neyðugt at fáa eitt skip aftrat at sigla millum Suðuroynna og meginøkið.

Eyka trýst á jóansøku

Nú jóansøka er, leggjast millum trý og fýratúsund fólk aftrat hópinum, sum plagar at ferðast millum Suðuroynna og meginøkið. 

Hetta setur eitt eyka trýst á Smyril, sum tekur beint undir túsund ferðandi. 

- So hetta er ein stór kabal, sum skal ganga upp, sigur strandferðslustjórin.

Eykatúrar settir inn

Ein eykatúrur aftur og fram er settur inn leygardag, og sunnudag eru tríggir túrar.

Hetta hevur eisini við sær, at eyka fólk eru sett á vakt umborð og ikki minst at stýra ferðsluni.

Tað er eisini ein ávís hvílitíð, sum skal haldast, og tí fer Teistin eisini at sigla onkran túrin.