Korini styggja lærarar burtur

Samstundis sum at fleiri og fleiri tilflytarar koma til landið og vilja læra málið, eru tað lærarar við útbúgving í føroyskum sum annaðmál, sum siga seg úr starvi.

Teir kenna seg ikki aftur í sáttmálanum, sum í roynd og veru er gjørdur til miðnámsskúlalærarar.

Síðsti dagur á Glasi

Í gjár vórðu prógvini handað, og Petra Olsen hevur havt sín síðsta dag sum undirvísari í føroyskum sum annaðmál, eisini kallað FSA.

- Høvuðsorsøkin er tann, at eg á ongan hátt dugi at síggja mítt starv og mítt virksemi aftur í sáttmálanum, sigur Petra Olsen.

Hon hevur starvast sum lærari í føroyskum sum annaðmál í seks ár, hevur eina bachelor í føroyskum, og so tók hon útbúgvingina í føroyskum sum annaðmál fyri tveimum árum síðani. Um sama leiti bleiv undirvísingin flutt úr kvøldskúlanum og út á Glasir. 

Hetta var eitt skifti, sum Petra Olsen væl dugdi at síggja var neyðugt. Men ongantíð hevði hon trúð, at tað fór at verða so trupult. 

Korini eru trupul

Tí í skiftinum komu FSA-lærarar undir nýggjan sáttmála - sama sáttmála sum miðnámsskúlalærararnir. Og her eru fleiri við Petru Olsen, sum ikki kenna seg heima í sáttmálanum.

- Vit hava eitt heilt annað virksemi, enn tey hava. Vit arbeiða eftir eini aðrari skipan, enn tey arbeiða eftir. Vit hava ein annan gerandisdag enn tey, so tað er ordiliga nógv, sum bara ikki hóskar saman.

Men tað eru altíð fleiri sjónarhorn, og Petra Olsen skilur eisini væl, at hetta ikki hevur verið lætt hjá Yrkisfelagnum Miðnámi, sum er fakfelagið hjá flestu miðnámsskúlalærarum.

- Tey hava bara fingið okkum tveitt inn í teirra sáttmála, uttan at tey hava havt tíð til at gera hann til reiðar. Men samstundis greiddu tey eisini frá í eini ársfrágreiðing, at FSA ikki hoyrdi heima á miðnámsskúlaøkinum, og tí eri eg samd í.

Einasta loysnin at siga upp

Sjálv heldur Petra Olsen, at hon hevur gjørt alt fyri at finna eina loysn. Hon hevur samskift við Yrkisfelagið, Undirvísingarstýrið, leiðaran og politikarar, og nú sá hon ongan annan útveg enn at siga seg úr starvi.

Men hetta er ein sorgblíð tíð fyri læraran. Hon fer at sakna bæði næmingarnar og undirvísingina, men korini hava ikki verið nøktandi, og tí kundi hon ikki verða verandi í starvinum.

Spurd, um hon vil undirvísa í føroyskum sum annaðmál aftur, um ein loysn verður funnin upp á sáttmálan, er svarið eitt greitt ja.