Óformligar summarkonsertir hjá Symfoniorkestrinum

Tá vit hugsa um klassiskan tónleik og um symfoniorkestur, so er kanska lætt at hugsa, at tað er eitt sindur stívt og formligt. Nú roynir Føroya Symfoniorkestur at gera tað eitt sindur meiri óformligt og fólksligt.

- Til hesar konsertirnar hava vit gjørt eitt sindur øðrvísi konsept, enn vit vanliga gera, sigur Hans Petur í Brekkunum, stjóri í Føroya Symfoniorkestri.

Konsertin er ikki so long sum tær vanligu stóru klassisku konsertirnar. Hon varir umleið ein tíma. Og so eru fleiri styttri og lættari verk á.

- Serliga í Fulgafirði hava vit roynt at gjørt eina kafékonsert, har fólk fara at sita niðri á gólvinum við borð tætt við orkestrið, og kunnu fáa ein kopp av kaffi ella eitt glas av víni afturvið tónleikinum. 

Hugskotið kemur frá Mentanarhúsinum í Fuglafirði. Hans Petur í Brekkunum og nýggi dirigenturin, Catherine Larsen-Maguire, vóru á fundi í Mentanarhúsinum í Fuglafirði. Leiðarin í Mentanarhúsinum, Jón Tyril, spurdi so, um tað kundi gerast øðrvísi, og tað hildu tey vera eitt gott hugskot.

- Um mann kanska heldur, at klassiskar konsertir eru eitt sindur formligar, og tað eru tær eisini við hvørt, so er tað ein máti at loysa eitt sindur upp fyri tí og gera tað eitt sindur meiri óformligt, sigur Hans Petur í Brekkunum,

Summarkonsertin hjá Symfoniorkestrinum er í Mentanarhúsinum í Fuglafirði í kvøld kl. 20 og í Hátúni í Havn í morgin kl. 16.

Hoyr innslag úr Útvarpstiðindunum.