G! 2026: Silent Disco hevur fest búgv í Føroyum

Silent Disco kom upprunaliga til Føroya at vera á G! fyri nøkrum árum síðani. Men eins og hitapottarnir, so hevur Silent Disco fest búgv í Føroyum. 

Í november í fjør keypti Bergur Poulsen útgerðina, ið krevst, fyri at skipa fyri Silent Disco í Føroyum alt árið.

Tá vóru ikki so nógvar bókingar beinavegin, men tað broyttist í vár, tí síðani tá hava teir verið fullbókaðir, og nú hava Bergur og teir eisini Silent Disco á G!

Tað eru øll sløg av tiltøkum tað verður bókað til- brúdleyp, húgvuveitslur, fyrilestrar o.s.fr. 

G! gav íblásturin

Bergur Poulsen keypti útgerðina aftaná hann hevði verið til G! í fjør summar, har Silent Disco var á skránnið við útlendskum fyriskiparum.

"Eg hevði eina so stuttliga uppliving saman við mínum vinmonnum tá vit vóru til Silent Disco á G! í fjør, og eftir tað tók eg eina avgerð um at keypa útgerðina."

Silent Disco er sum at vera í einum klubba, men tú hevur tónleikin í oyrabúffum ístaðin. So eru trý sum diska, og tey stýra hvør sínum liti, sum man kann skifta ímillum á oyrabúffunum. So kann man finna tey, sum lurta eftir sama liti, og so hoyrir man sama sang.

Hví er tað so væl umtókt? 

"Eg haldi tað er tí at man sleppur at syngja við so hart sum man kann, uttan at nakar lurtar. Tað er sum tá man koyrir biltúr við vinfólkunum og øll skrála við frá hjartanum," sigur Bergur Poulsen.