Skipið hjá Paul Watson aftur í íslendskum sjógvi

Skipið hjá Captain Paul Watson Foundation, Bandero, er aftur í íslendskum sjógvi.

Tað váttar varakunningarstjórin fyri íslendsku vaktar- og bjargingartænastuna, Magnús Pálmar Jónsson.

Endamálið við ferðini hjá Bandero er, sambært felagsskapinum, at steðga hvalaveiðini hjá p/f Hvali.

Magnús Pálmar Jónsson sigur, at skipið boðar javnan frá síni knattstøðu. 

Hann sigur, at vaktar- og bjargingartænastan fylgir neyvt við, hvar Bandero er, eins og gjørt verður við alla skipaferðslu í íslendskum sjógvi.

Bandero kom í íslendskan sjógv seint í junimánaði, men noyddist tíðliga í juli til Írlands, tí ein av manningini hevði tørv á læknahjálp, og neyðugt var at skifta manning.

Íslendska vaktar- og bjargingartænastan beyð sær til at senda tyrlu eftir sjúka manninum á Bandero, men Bandero segði nei takk og fór til Írlands.

Tá lovaði Watson, at herferðin hjá Bandero ikki var liðug, og at skipið fór at koma í íslendskan sjógv aftur sum skjótast.