Nógv tey flestu mæla frá

Suðurstreymoyar útróðrarfelag tekur undir við uppskotinum. 

Vørn hevur ongar viðmerkingar um uppskotið.

Umboðið hjá feløgunum hjá arbeiðsfólki á fiskavirkjum í Fiskivinnuráðnum svaraðu ikki.

Felagið Trolbátar vísir á, at hóast uppskotið ikki gagnar bólki 4T, er tað jaligt, at landsstýrismaðurin vil hava broytingar í fiskidagaskipanini. 

Felagið vísir samstundis á, at umsitingarætlanin frá 2019 ikki longur verður fylgd.

Øll skipanin

Fiskidagaskipanin eigur at vera viðgjørd í síni heild, og ikki bara fyri bólk 5B. 

Trolbátar mæla til, at løgtingið viðger allar skipabólkar av nýggjum.

Fiskimálaráðið skal halda seg til semjuna frá 2019, so umsitingarætlanin verður betur kjølfest sum grundarlag undir fiskidagaskipanini.

Men annars tekur eingin teirra, sum komu við hoyringarskrivi um uppskotið hjá Bárði á Steig Nielsen, landsstýrismanni, um at geva bátunum í bólki 5B 750 fiskidagar aftrat í ár, undir við uppskotinum.

Tey eru Reiðarafelagið, Skipara- og Navigatørfelagið, Meginfelag útróðrarmanna, Havstovan, Fiskimannafelagið, Ráfiskakeyparafelagið og Ráfiskaseljarafelagið.