Elias og Hákun sigraðu í fyrsta umfari

Bæði Elias Ellefsen á Skipagøtu og Hákun West av Teigum kundu fara væl nøgdir av vøllinum í gjárkvøldið.

Bæði THW Kiel og Füchse Berlin vunnu nevniliga sínar fyrstu dystir, tá nýggja kappingarárið í Bundesliguni fór av bakkastokki.

THW Kiel legði fyri á heimavølli ímóti Lemgo. Útiliðið, sum endaði á 5. plássi frammanfyri Kiel í fjør, treiskaðist í eini 40 minuttir, áðrenn Elias Ellefsen á Skipagøtu og teir fóru undan.

Føroyski bakspælarin skoraði fýra mál upp á átta royndir í 35-27 sigrinum hjá norðurtýska stórliðnum.

Elias Ellefsen á Skipagøtu og Kiel komu væl frá byrjan á heimavølli ímóti Lemgo Lippe, sum endaði nummar fimm í fjør.

Fyrri hálvleikur tryggjaði sigurin

Füchse Berlin kom eisini væl frá byrjan við heimasigri á Melsungen. 

Hákun West av Teigum og teir tryggjaðu sær í roynd og veru sigurin í fyrra hálvleiki, sum teir vunnu heili 17-9.

30 minuttir seinni vóru bert tvey mál á muni, men eingin vandi var á ferð hjá høvuðsstaðarfelagnum, sum vann 33-31.

Føroyski høgri vongurin skoraði tvey mál upp á tríggjar skotroyndir. Vilhelm Poulsen og Hannover-Burgdorf spæla sunnudagin ímóti Rhein-Neckar Löwen.