Fiskiskapur eftir svartkjafti kann missa burðardygga góðkenning

Hóast svartkjaftastovnurin hevur tað gott, missir fiskiskapurin væntandi sína góðkenning sum burðardyggur fiskiskapur í næsta mánaði, tí ongin strandarlandasemja er.

Men evropeisku mjøl- og lýsiframleiðararnir arbeiða av øllum alvi við at fáa knæsett eina nýggja góðkenning, sum skal tryggja burðardygdina.

Í oktober gongur sonevnda FIP-góðkenningin av svartkjaftaveiðuni út.

FIP, Fisheries Improvement Programme, snýr seg um átøk, har fleiri áhugapartar saman arbeiða fyri at gera ein fiskiskap burðardyggan.

Svartkjaftaveiðan hevur verið fevnd av FIP-góðkenningini seinastu 4-5 árini, men tá hon er burtur, verða tað aftur tey vanligu mátini - at veiðan skal fylgja ICES-tilmælunum, og at strandarlondini skulu vera samd - ið sertifiseringsstovnarnir fara at hyggja at, tá teir skulu taka støðu til, um fiskiveiðan skal góðkennast sum burðardygg ella ikki.

Hoyr innslag í útvarpstíðindunum og samrøðu við Odd Eliasen, stjóra á Havsbrún, sum júst hevur endað sítt formansskeið í evropeiska felagsskapinum fyri fiskamjøl- og lýsiframleiðarar: