Rektarin: Hava ikki kunnað nóg væl

Fyrrapartin var trappustreyka í Glasi. Næmingarnir vóru ónøgdir um, at broytingar eru gjørdar í tímatalvuni uttan nøktandi kunning.

Ása Thorkildshøj, næmingur á Glasi, greiðir frá.

- Altso, tað snýr seg um, at vit hava fingið álagt at hava næmingatíð, har tveir tímar eru lagdir inn í okkara tímatalvu. Vit hava onga kunning fingið um, hvat tað snýr seg um. Vit vita ikki, hvat hetta er. Vit eru øgiliga ónøgd um, at vit ikki fáa nakra kunning.

Trappustreykan byrjaði klokkan 10. Tá tey høvdu sitið í umleið ein tíma, hendi so okkurt. Tá varð boðað á hátalara, at avtala varð gjørd við rektaran og leiðsluna um, at eitt umboð í hvørjum flokki skuldi møtast við rektara og leiðslu at tosa um ætlaðu broytingarnar.

20260908_vitliki_vantandi_kunning_og_trappustreyka_0012.jpg

Ætlaðu broytingarnar

Eftir, at floksumboð høvdu verið á fundi við leiðsluni, fingu vit orðið á Unu Joensen, rektara, sum greiddi frá teimum ætlaðu broytingunum.

- Tá tú gongur á gymnasialum miðnámi, so skulu allir næmingar lata nokk so nógvar uppgávur inn. Tað eru uppgávur, sum teir vanliga gera heimanífrá, og tað eitur næmingatíð. Tað, sum vit so hava gjørt nú, er, at vit taka ein part av hesi næmingatíðini inn á skúlan og leggja tað inn á tímatalvuna, soleiðis at tey avhalda ein part av tíðini her á skúlanum í vanligari undirvísingartíð.

Glasir, Trappustreyka

Vit spurdu so rektaran, hví mann ger broytingar sum hesar, tá ið næmingarnir eru so ónøgdir um tað, sum teir eru.

- Ja, tey eru ónøgd, og tað skulu vit taka í egnan barm. Vit hava ikki kunnað nóg væl um tað. Vit hava kunnað fyri lærarum, men vit hava ikki kunnað næmingarnar nóg væl. Tað skulu vit nokk taka í egnan barm og gera betur.

- Fortreytirnar fyri undirvísing broytast jú, og tær broytast serliga við vitlíki. Tað er komið við rúkandi ferð inn yvir okkum tey síðstu árini. Sum eina loysn hava vit so valt at taka ein part av hesi næmingatíðini inn á skúlan, so tað verður skipað undir kørmum, sum lærarin og næmingarnir eru tryggir við.

Men næmingarnir á Glasi vóru alt annað enn nøgdir við tær ætlaðu broytingarnar.

Ørvur Mortensen, næmingur á Glasi, greiðir frá, at tey hava savnað undirskriftir frá flestøllum næmingum á skúlanum, ímóti ætlaðu broytingunum.