Hákun seks mál - Elias vann á Vilhelmi

Hákun West av Teigum var við aftur millum teir fyrstu sjey hjá Füchse Berlin eftir Champions League-stórsigurin á Partizan, tá føroyingurin varð spardur.

Høgri vongurin gjørdi eisini sítt í heimasigrinum á Gummersbach við seks málum upp á níggju málroyndir. Bara Mathias Gidsel og Tim Freihöfer skoraðu meir enn Hákun West av Teigum. Teir fingu níggju í part, og høvuðsstaðarliðið vann 33-28.

Eitt mál hjá Hákuni West av Teigum er við í samandráttinum av dystinum millum Füchse Berlin og Gummersbach, sum høvuðsstaðarliðið vann.

Elias og teir vunnu á Vilhelmi og teimum

Vilhelm Poulsen skeyt fleiri mál enn Elias Ellefsen á Skipagøtu í føroyingaruppgerðini millum Kiel og Hannover-Burgdorf. 

Høgri bakkurin hjá gestunum skoraði tríggjar ferðir og legði upp til tvey mál, men tað var kortini Elias Ellefsen á Skipagøtu, sum kundi fegnast um sigurin á heimavølli.

Kiel vann dystin 29-26, og føroyski bakspælarin fekk ikki so nógva spælitíð. Hann fekk kortini skotið eitt mál seint í dystinum.

Elias Ellefsen á Skipagøtu skoraði eitt mál í sigrinum á Vilhelmi Poulsen og teimum í Hannover-Burgdorf. Júst tað málið er við í samandráttinum omanfyri.

Norðurtýskararnir hava fult stigatal saman við Flensburg, nú fýra umfør eru spæld, men dystarskráin hevur verið vinarlig higartil. 

Füchse Berlin er á 4. plássi við seks stigum, og Hannover-Burgdorf hevur fimm stig á 6. plássi.