Serfrøðingur: Evropa kann og skal verja seg sjálvt

- Evropa er sterkt, og kann og skal verja seg sjálvt.

Tað sigur Regin Berg, serkønur í altjóða politikki, nú Ursula von der Leyen, ES-nevndarforkvinna, mælir til, at Evropa ger sína egnu verjusamgongu.

Ursula von der Leyen helt í morgun sína árligu "State of the union"- røðu fyri ES-tinginum.  

ES-nevndarforkvinnan skeyt upp stórar broytingar í trygdarviðurskiftunum í Evropa.

Hon mælti til, at leiðarar í ES-londum, Ukraina, Bretlandi, Noregi, Kanada og øðrum londum skipa eina nýggja samgongu, sum skal samskipa handfaringina av vaksandi trygdarhóttanum úr Russlandi.

Ursula von der Leyen

Trygdarráð og Nato

Hon vil eisini, at Evropa skipar sítt egna trygdarráð, og at ein skipan verður gjørd, sum líkist grein fimm í Nato-sáttmálanum, sum sigur, at verður eitt Nato-lond álopið, er tað at meta sum álop á øll Nato-lond.

Boðskapurin var greiður, sigur Regin Berg:

- Hetta er eitt svar til nógvu provokatiónirnar úr Russlandi seinastu tíðina, men eisini til USA, um at Evropa er ført fyri at standa á egnum beinum, og at mann ger seg til reiðar at standa ímóti trýsti, sama hvaðani tað kemur, sigur hann.

Hoyr innslag í útvarpstíðindunum: