Sendistovurnar í Moskva og Tel Aviv lata aftur

Føroysku sendistovurnar í Moskva og Tel Aviv verða nú niðurlagdar. Hildið verður fram við sendistovu í London, men nú verður tað sendifólkið til ES, sum eisini verður sendifólk til Bretlands.

Tað boðar uttanríkis- og fiskimálaráðið frá í sambandi við, at fíggjarlógin fyri 2027 er løgd fram í dag.

Ráðið sigur í fráboðan, at Uttanríkistænastan verður umskipað, so orka og førleikar í størri mun verða savnað um Norðuratlantshav og Arktis.

Export Faroe Islands verður styrkt og skal virka sum ein felags pallur, har vitan, førleikar og netverk verða knýtt saman í skipaðum samstarvi við vinnuna. Í hesum samstarvi verða marknaðir eyðmerktir, har mett verður, at føroyskt vinnulív hevur serligar møguleikar, skrivar uttanríkis- og fiskimálaráðið.

Á fíggjarlógini verða tvær mió. krónur settar av til Export Faroe Islands, og ætlanin er at økja játtanina komandi árini.