Vestmenningar og hvalbingar hava keypt Biritu

Smápartafelagið Gráisteinur, sum eigur uppsjóvarskipið Biritu, er selt.

Tað skrivar heimasíðan hjá Fiskimannafelagnum í dag.

Sambært heimasíðuni liggur keypsprísurin millum 250 og 300 milliónir krónur.

Keypararnir eru eitt felag aftan fyri uppsjóvarskipið Vestmenning, sum skal eiga 40 prosent, og eitt felag aftan fyri uppsjóvarskipið Arctic Voyager, sum skal eiga 60 prosent, skrivar Fiskimannafelagið.

Fyrr í ár var ætlanin annars, at sp/f Gráisteinur skuldi gerast partur av einum nýggjum stórreiðaríi saman við Ango og helvtini av felagnum Kinnfelli. 

Ætlanin var komin so langt, at Kappingareftirlitið hevði góðkent hana, men samanleggingin bleiv av ongum.