Vansin er at hvørt ráð byggir upp egna serfrøði

Vansin við at leggja niður verkætlanardeildina hjá Landsverki og flyta tað, sum hon gjørdi, til aðalráðini, er, at hvørt ráð byggir upp egna serfrøði um at leiða stórar byggiverkætlanir og samstarv við uttanhýsis byggiharraráðgevar.

Hetta kann gera, at systemvitan hvørvur, og at skipanin í meira verður persónsbundin.

Tað viðgongur Jacob Vestergaard, landsstýrismaður, í svari til Sirið Stenberg, løgtingskvinnu.

Eyðsæð fer slík umskipan eisini í fyrstu atløgu í ávísan mun at ávirka verandi rakstur, verkætlanir, sum eru byrjaðar, og verkætlanir, sum vera fyrireikaðar, sigur landsstýrismaðurin. 

Hann endurtekur, at samgongan tók alt fyri eitt politiska avgerð um, at bygningsfyrisitingin ikki longur skuldi vera hjá Landsverki, men hjá aðalráðunum.

Og tað hóast ein arbeiðsbólkur hjá undanfarna løgmanni segði, at verandi skipan við Landsverki sum byggiharra er tann frægasta.