Vilja bíða við yvirtøku

Samgongan mælir frá at yvirtaka løgreglu, ákæruvald og brotsmálaumsorgan nú.

Tað er annars uppskotið hjá Tjóðveldi.

Uttanlandsnevndin hevur viðgjørt uppskotið á trimum fundum og skrivað álit.

Meirilutin í nevndini sigur, at drúgva frágreiðingin, sum føroysk og donsk embætisfólk skrivaðu um møguliga yvirtøku í 2003, skal endurskoðast.

Landsstýrið er í ferð við at endurskoða og dagføra frágreiðingina. 

Hetta arbeiðið verður væntandi liðugt næsta ár.  

Tjóðveldi og Framsókn mæla tíl í álitinum at fremja yvirtøkuna, tó ikki í 2028, men í 2030.  

Høgni Hoydal og Bjarni Kárason Petersen siga, at í viðgerðini í uttanlandsnevndini er greitt og eyðsýnt komið fram, at løgreglan, ákæruvaldið og brotsmálaumsorganin vera stýrd og umsitin uttan um alt fólkaræði og fólkavaldar myndugleikar í Føroyum.  

Uttanlandsnevndin hevur fingið at vita frá ríkisløgregluni, at løgregla og ákæruvald í Føroyum kosta  181,3 mió. kr. um árið.