Eingin búskaparvøkstur at hóma

Samstundis sum uppsjóvarvinnan og alivinnan hava gyltar dagar, er eingin veruligur búskaparvøkstur at hóma.

Tað segði Edmund Joensen, fólkatingsmaður, á landsfundinum hjá Sambandsflokkinum í gjár. 

Hann segði, at hallið á fíggjarlógini seinastu árini hevur havt við sær, at almenna bruttoskuldin nú er umleið seks milliardir kr. Tá rentan, sum hevur verið metlág, fer aftur at hækka, fer at sansa at í landskassanum, segði Edmund Joensen.

Fólkatingsmaðurin hjá Sambandsflokkinum eftirlýsti nýskipanir, sum skulu tálma útreiðslunum á fíggjarlógini, og hann spurdi, hvar meirinntøkurnar, sm skuldu fáa bilbukt við hallinum eru.

Edmund Joensen spurdi eisini, hvønn virknað flatskatturin hevur havt.

- Øll síggja, at nógv, ið kann verða gjørt frá landsstýrisins síðu, verður ikki gjørt. Tey, sum stýra í hesum døgum, hava eina tunga ábyrgd á sínum herðum, segði Edmund Joensen, fólkatingsmaður, í røðu síni á landsfundinum hjá Sambandsflokkinum.