Uppskotið um samráð og hoyringar neyvan samtykt

Samgongan vil ikki vita av broytingunum, sum Tjóðveldi vil hava í stýriskipanarlógini, og sum flokkurin segði hevði til endamáls at styrkja fólkaræðið.

Tað er púra greitt, nú Rættarnevndin hevur skrivað álit um tey trý uppskotini. Samgongan hevur seks av sjey nevndarlimum, og tey mæla løgtinginum frá at samtykkja uppskotini.

Tjóðveldi skjeyt upp at hava almenn samráð og almennar hoyringar í nevndunum hjá løgtinginum.

Tjóðveldi vil eisini hava minnilutaverju, so ein triðingur av løgtingslimunum kann fáa lógaruppskot, sum løgtingið annars hevur samtykt, til fólkaatkvøðu, og løgmansval eftir hvørt løgtingsval.

Og Tjóðveldi vil ikki, at undantøk frá almennum innliti kunnu ásetast í serstakari lóg, eins og gjørt var teirri lógini um Skálafjarðartunnilin, sum Kári P. Højgaard legði fyri løgtingið, tá hann var landsstýrismaður í innlendismálum.

Meirilutin sigur, at í staðin fyri at gera tillagingar í stýrisskipanarlógini, eigur orkan at verða brúkt til at finna eina breiða politiska og fólksliga semju um eina stjórnarskipan fyri Føroyar. Eina stjórnarskipan, sum byggir á uppskotið, sum var komið undir land í 2010.

Løgmaður ella formenninir í øllum flokkum á tingi eiga at taka stig til hetta arbeiðið, sigur meirilutin í Rættarnevndini.

Løgmaður segði longu í 2012, at hann fer at koma í løgtingið við uppskoti um stjórnarskipan.

Løgtingið fer týsdagin at atkvøða um tey trý uppskotini hjá Tjóðveldi.