Super finala endaði við javnleiki

Mannsfinalan millum VÍF og KÍF fekk ein dramatiskan enda. Tá klokkan vísti 29 minuttir og 53 sekund var KÍF á odda 26-25.

VÍF fær tríggjar metur kast, og í einari síðstari roynd leggja teir upp til Áka Egilsnes, sum skýtur á tvørstongina og í máli.

Ein dramatiskur endi á einari sera spennandi finalu.

- Eg broytti meining í síðsta sekundi. Eg ætlaði at skjóta í tað fjarða hornið, men valdi so hitt, og tað eydnaðist. 

- Eg var glaður fyri málið, og eg veit ikki, hvar heilin var, tá eg hoyrdi rópini frá okkara áskoðarum, og eg visti, at hann var í málinum, segði Áki við útvarpið

Andrias Nielsen: Vit vinna í Kollafirði

Andrias Nielsen segði aftan á dystin við útvarpið, at hann var ikki so keddur um, at teir mistu sigurin í síðstu løtu.

-Leygardagin spæla vit á heimavølli við føroya bestu áskoðarum í rygginum, og tá vinna vit FM, segði Andrias Nielsen.

Áki Egilsnes: FM kemur til Vestmanna leygardagin

- Leygardagin spæla vit allan dystin soleiðis sum vit byrjaðu hendan dystin, og tað verður nokk til at tryggja okkum FM, segði Áki Egilnes við útvarpið.

VÍF - KÍF 26-26 (15-13)

Toppskjútti, VÍF: Áki Egilnes 8

Toppskjútti, KÍF: Hans Eli Sigurbjørnsson 6