Strandfaraskip skulu ikki sigla halgidagar

Alfred Olsen, Bjarni Djurholm, Hanus Samró og Janus Rein í Vinnunevndini mæla løgtinginum til at fella uppskotið hjá Pálli á Reynatúgvu og Sirið Stenberg um, at strandfaraskipini eisini skulu sigla langa fríggjadag, páskadag og jóladag. 

Meirlurin sigur seg skilja tørvin hjá fólki at kunna ferðast allar dagar á árinum, men heldur støðuna hjá Strandferðsluni vera so álvarsama, at meirlutin krevur eina samlaða loysn "her og nú," sum skrivað stendur í álitinum. Meirlutin nevnir ítøkiliga fíggjarligu støðuna hjá stovninum og støðuna á fleiri farleiðum, sum er íkomin, eftir at Teistin fekk skaða, og varð tikin úr sigling.

Kostar 1,8 milliónir

Vinnumálaráðið hevur boðað nevndini frá, at tað fer at kosta umleið 1,8 milliónir krónur at lata skipini sigla hesar halgidagarnar, og hesa upphædd hava Strandfaraskip Landsins ikki, sigur meirlutin. Tí eru tveir  møguleikar - annaðhvørt játtar løgtingið Strandferðsluni hesa upphædd, ella tekur túrar burturúr, og sparir upphæddina á tann hátt. Meirilutin er ikki fyri at skerja túrataliðl, so einasta loysnin er at játta fleiri pengar, sigur meirlutin, sum tó ikki nevnir møguleikan at hækka ferðaseðlaprísin.

Meirilutin heldur, at hesir trupulleikar eiga at verða raðfestir fremst, og tekur tí ikki undir við uppskotinum.

Sjálvfylgja at sigla alt árið

Minnilutin, sum er Bjørt Samuelsen, Aksel V. Johannesen og Kári P. Højgaard, vísir á, at tað er einki minni enn ein sjálvfylgja, at ferðasamband er millum oyggjarnar allar dagar í árinum.  Minnilutin sigur, at Teistin sambært ferðaætlanini siglir átta túrar sunnudagar, Ternan fimm, og Smyril siglir tveir. Og verður ein skipan gørd, har tað í fyrsta umfari einans eru tveir ella tríggir túrar hesar halgidagarnar, verður tað væl bíligari enn tær umleið 1,8 milliónirnar. 

Minnilutin minnir á, at sjóvegis sambandið er at sammeta við fasta vegasambandið sum 85-86% av fólkinum longu hava og mælir tinginum til at samtykkja uppskotið.