Frants Jensen nýggjur aðalskrivari

Blaðstjórin á Trúboðanum verður nýggjur aðalskrivari Bláa Krossi í Føroyum

39 ára gamli Frants Jensen verður nýggjur aðalskrivari í Bláa Krossi.

20.06.2012 - 10:32

Landsnevndin í Bláa Krossi Føroya hevur sett 39
ára gamla Frants Jensen í starv sum aðalskrivara í felagsskapinum.
Frants er útbúgvin journalistur og hevur drúgvar
royndir innan fjølmiðlavirksemi. Seinastu árini hevur hann verið blaðstjóri á
Trúboðanum. Frants hevur ymiskar leiðsluroyndir og útbúgvingar innan leiðslu.
Eitt nú hevur hann eitt tíðarskeið verið virkandi aðalskrivari í
Heimamissiónini, og síðani 2007 hevur hann staðið á odda fyri øllum miðlaøkinum
hjá Heimamissiónini. Frants er virkin á mongum økjum, eitt nú hevur hann verið
formaður í Ísraelsmissiónini seinastu 10 árini.
Hann byrjar í starvinum hálvan august, og tekur
við eftir Hjalmar Hansen, sum fer í starv sum deildarstjóri á Handilsskúlanum á
Kambsdali.