Fara nú at viðgera kæruna um Johan Dahl

Týsdagin fer Landsstýrismálanevndin at hava fund um kæruna um Johan Dahl, landsstýrismann í vinnumálum. Allir fýra andstøðuflokkar hava kært fyrisitingina hjá Johan Dahl í sambandi við fíggjarligu viðurskiftini á Strandfaraskipum Landsins í 2013.

Floksformenninir, sum hava skrivað undir kæruna, vísa til frágreiðingina og viðmerkingarnar hjá Løgtingsgrannskoðarunum, sum løgtingið fekk 1.mai. Í teimum eru nógvar óvanliga hvassar atfinningar at Vinnumálaráðnum og landsstýrismanninum.

Skal gera fleiri niðurstøður

Andstøðan vil nú hava Landsstýrismálanevndina at gera niðurstøður um, hvørt Johan Dahl hevur fyrisitið á lógligan hátt, hildið stýrisskipanarlógina, lógina um landsins játtanarskipan og lógina um ábyrgd landsstýrisins. Harafturat um Johan Dahl annars hevur røkt tær skyldur, sum áliggja honum sambært lógum og regglum í fyrisitingini av hesum málinum, sum er fíggjarliga støðan hjá Strandferðsluni í 2013.