Formansskapurin ger einki við kanningina

Kanningin um Miðnámsdepilin í Suðuroynni gevur ikki grundarlag fyri at ákæra nakran, sum var í landsstýrinum tá

Tað hevur kostað løgtinginum 1,2 milliónir kr. at kanna málið um miðnámsskúlan í Hovi.

18.06.2012 - 17:28

<div>Løgtingið ger av, um nakað skal henda, nú tað hevur fingið kanningina um Miðnámsskúlan í Hovi.</div><div><br></div><div>Formansskapurin ger sum so einki við kanningina, sigur løgtingsformaðurin, Jógvan á Lakjuni.</div><div><br></div><div>14 tinglimir, tveir fimtingar av tingmanningini, heittu 11.november í 2010 á løgtingsformannin um at seta kanningarstjóra. Tað gjørdi løgtingsformaðurin, sum tá var Hergeir Nielsen, ein mánað seinni.  </div><div><br></div><div>Kanningarstjórin skuldi kanna embætisførsluna hjá løgmonnum og landsstýrisfólkum í sambandi við flytingina, byggingina og umvælingina av skúladeplinum á Heiðum í Hovi og tilknýtið til ætlanina um ellis- og røktarheim og psykiatriskan depil í Vági. </div><div><br></div><div><b>Ikki greið prógv</b></div><div><br></div><div>Majken Johansen, advokatur, var kanningarstjóri. Hennara kanning varð latin løgtinginum fyri einari viku síðani. Kanningarstjórin sigur, at ábendingar eru um, at alt ikki er farið fram, sum tað átti. Men prógvini eru ikki greið. </div><div><br></div><div>Millum annað er eingin fundarfrágreiðing skrivað um ein fund í Danmark millum Landsverk, byggifelagið MT Højgaard, sum var tað einasta, sum bjóðaði upp á arbeiðið í Hovi, og Árna Winther arkitektar. </div><div><br></div><div>Jógvan á Lakjuni, sum tá var landsstýrismaður í mentamálum, var við í telefonini. Mentamálaráðið hevur einki telefonupprit frá fundinum heldur. </div><div><br></div><div>Tað var eftir hendan fundin, at prísurin hækkaði úr 60 upp í 74 milliónir krónur. </div><div><br></div><div><b>Einki revsivert</b></div><div><br></div><div><div>Sambært kanningini hevur eingin í landsstýrinum gjørt nakað revsivert í málinum um byggigøluna í Hovi. Ein gerðarrættur viðger eina ósemju millum MT Højgaard og Landsverk um nógvar milliónir krónur.</div><div><br></div><div>Eingin av teimum, sum eru nevnd í kanningini, vilja siga nakað um tað, sum í henni stendur.   </div><div><br></div><div>Kanningin um Miðnámsskúlan í Hovi kostar løgtinginum 1,2 milliónir krónur.</div></div><div><br></div><div><b>Meiri verður at frætta í útvarpstíðindunum.</b></div><div><b><br></b></div>