Virðisbrævamarknaðurin riggar av

Partafelagið Virðisbrævamarknaður Føroya er farið í sjálvbodna solventa likvidasjón

Tað varð avgjørt á aðalfundinum fríggjadagin.  Á aðalfundinum var uppskot um at taka av felagið. 

Eina tíð hevur verið arbeitt við einum tilmæli um framtíðina hjá Virðisbrævamarknaðinum.  Men rakstrarhall, vantandi undirtøka frá børsskrásettu fyritøkunum og tað, at føroysk feløg biðja um at verða strikað í íslendska keypsskálanum fekk nevndina at mæla partaeigarunum til at steðga virkseminum og taka felagið av. Øll, sum vóru á aðalfundinum, tóku undir við tí.

Eginpeningurin goldin út

Nevndin avgjørdi fyri tveimum mánaðum síðani at mæla aðalfundinum til at strika felagið. Eginpeningurin verður útgoldin partaeigarunum. 

Virðisbrævamarknaðurin varð stovnaður tann 7.november í 2000 fyri at skapa virði fyri føroysku fyritøkurnar, sum vóru skrásettar í keypsskálum, og fyri at byggja íleggjaraumhvørvi í Føroyum.