- Tíðindi, mentan og ítróttur
Sleppur ikki at broyta skattastigan
<div>Landsstýrismaðurin í fíggjarmálum sleppur kortini ikki at broyta skattastigan við kunngerð.</div><div><br></div><div>Tað avgjørdi løgtingið, tá tað hósdagin samtykti at strika eina lógarbroyting, sum gav landsstýrismanninum heimild at broyta skattastigan við kunngerð. Tann lógarbroytingin varð annars samtykt við aðru viðgerð tann 1. mai, men hósdagin feldi løgtingið uppskotið við 3. viðgerð eftir tilmæli frá eini samdari Fíggjarnevnd.</div><div><br></div><div><b>Nógv rok</b></div><div><br></div><div>Nógv rok var um lógaruppskotið hjá Jørgeni Niclasen, landsstýrismanni, um at prísjavna skattastigan eina ferð um árið.</div><div><br></div><div>Løgfrøðingar hjá løgtinginum og Innlendismálaráðnum søgdu, at hetta var greitt brot á stýriskipanarlógina. Og tað sama segði andstøðan í løgtinginum, sum kærdi landsstýrismannin í fíggjarmálum til landsstýrismálanevndina. Lógarbroytingin fór at geva landsstýrismanninum loyvi til at broyta skattastigan við kunngerð. Stýriskipanarlógin sigur, at skattur kann bara broytast við lóg. </div><div><br></div><div>Tá triðja viðgerð skuldi vera fyrst í mai, varð hon útsett, tí løgmaður vildi sleppa at kanna uppskotið fyrst.Tann kanningin er ikki liðug. Men triðja viðgerð var kortini hósdagin. Og tá mælti Fíggjarnevndin til rætt og slætt bara at strika lógarbroytingina. Og tað samtykti løgtingið.</div><div><br></div><div><b>Skattatrýstið hækkar</b></div><div><br></div><div>Verður skattastigin ikki prísjavnaður eina ferð um árið, fer skattatrýstið at hækka.</div><div><br></div><div>Tað siga Jørgen Niclasen, landsstýrismaður, og Atli Suni Leo, aðalstjóri, um lógarbroytingina.Teir siga, at prístalið verður ásett við lóg. Og landsstýrismaðurin skal ikki gera prístalsjavningina, men bara kunngera hana. Árliga broytingin í skattastiganum verður tí framd sambært lóg, siga teir í Fíggjarmálaráðnum. </div><div><br></div><div>Fíggjarmálaráðið og samgongan vísa eisini á ein hægstarættardóm, sum staðfestir, at ætlaða lógarbroytingin er ikki brot á stýriskipanarlógina. Hin parturin í skattauppskotinum hjá Fíggjarmálaráðnum varð tó endaliga samtyktur hósdagin. Hann sigur, at barnafrádrátturin hækkar 1000 kr. </div><div><br></div><div><br></div><div><br></div>
