Eysturoyartunnilin: Nú byrjar kanningin

Sjey fólk, fimm embætisfólk og tveir politikarar, eru boðsend at svara spurningum frá Hans Gammeltoft-Hansen, sum kannar tunnilsmálið fyri Landsstýrismálanevndina hjá løgtinginum.

Hans Gammeltoft-Hansen, kanningarstjóri, hevur fingið høli í Dómhúsinum í Havn í næstu viku.

Tríggir dagar, mánadagurin, týsdagurin og mikudagurin, eru settir av til at spyrja embætisfólkini Sjúrð Rasmussen, Rúna Joensen, Ewald Kjølbro, Kaj Johannesen og Nellu Festirstein, og floksformenninar Høgna Hoydal og Aksel V. Johannesen. 

Føroyskir advokatar hjálpa

Hans Gammeltoft-Hansen hevur tveir føroyskar advokatar afturat sær, Majken Johansen, sum býr og arbeiðir í Danmark, og Jens Wang í Havn. 

Jógvan Páll Lassen er hjásiti hjá Kára P. Højgaard, fyrrverandi landsstýrismanni, og Sigmund Poulsen hjá Kaj Leo Holm Johannesen, løgmanni.

Um mánaðaskiftið august-september eru settar av tvær vikur til spyrja fólk um tunnilsmálið.

Kanningararbeiðið er opið fyri almenninginum.