Gongdin í oljuvinnuni eigur at verða eftirmett

Oljuvinnufelagið mælir til, at ráðleggingarnevnd verður sett at eftirmeta gongdina innan oljuvinnuna. Tað skrivar heimasíðan hjá Vinnuhúsinum.

Oljuvinnufelagið legði í farnu viku fram ársfrágreiðing sína. 

Framtíðar menning

Í henni mælir felagið millum annað til, at ráðleggingarnevnd verður sett at eftirmeta gongdina innan oljuvinnu higartil, og nevndin skal eisini veita ráð um framtíðar menning og viðgera tær avbjóðingar, sum fylgja við, um olja verður funnin í rakstrarverdum nøgdum á føroyska landgrunninum. 

Í frágreiðingini verður sagt, at ráðleggingarnevndin nýtist ikki at kollvelta vælvirkandi kolvetnislógina og leistin, hon er skorin eftir. 

Hinvegin skal hon taka upp spurningin um, hvussu vit menna okkum uppaftur meiri á hesi leið, og samstundis kann hon viðgera spurningin um, hvussu henda luttøka í altjóða oljuvinnu kann skipast í samljóði við virksemi heima í Føroyum. Avbjóðingin er at skapa felags fyrimunir fyri eina oljuvinnu og fyri føroyska samfelagið.

Marknaðarføra meiri
 
Oljuvinnufelagið tekur undir við, at meira verður gjørt burturúr at marknaðarføra føroyska landgrunnin fyri oljufeløgum fyri at fremja áhugan fyri áhaldandi leiting eftir kolvetnum. 

Felagið heldur, at peningurin til marknaðarføring átti at verið settur av á fíggjarlógini, heldur enn at brúkt verður burturav pengum, sum oljufeløgini hava játtað til førleikamenning í Føroyum, skrivar Vinnuhúsið.