Yvirfriðingarnevndin góðtekur havnarútbyggingina

Yvirfriðingarnevndin gav fyri tveimum vikum síðani loyvi til stóru útbyggingina á Eystaru bryggju í Havn.

Og í gjárkvøldið samtykti býráðið at játta eina millión krónur afturat teimum trimum, sum býráðið játtaði fyri einum góðum ári síðani. 30.mai í fjør samtykti býráðið at fara undir kanningar og fáa til vegar neyðugu loyvini til stóru havnarútbyggingina .  

Um Skansan sigur bygginevndin, at samskifti hevur verið við Fornminnisnevndina.  Umhvørvið við Skansan skal vera eitt trivnaðarøki eftir útbyggingina.

Leyst av fjøruni

Nýggja havnarlagið verður okkurt um hálvthundrað metrar leyst av fjøruni undir Skansanum, og har verður møguleiki at leggja smábátar.

Bygginevndin sigur eisini, at grótið til útbyggingina kann takast úr grótbrotinum á Gluvursnesi. Yvirfriðingarnevndin hevur góðkent, at grótbrotið verður víðkað. Men avtala um gróttøku er ikki gjørd við Búnaðarstovuna enn.

Neyðugt er at gera eina modellroynd, sum verður liðug í september í ár.

700 m av atløgusíðu

Sambært uppskotinum verður havnin í Havn víðkað 163.000 fermetrar, og 700 metrar av atløgusíðu koma afturat. 

Býráðið samtykti í gjárkvøldið við tíggju atkvøðum at játta eina millión krónur til fyrireiking og byggiskrá, og at kanningin, sum lýsir árinini á umhvørvið, verður send Umhvørvisstovuni til góðkenningar.