Ov fáir lærarar fáa førleikaviðbót

Lærarar í fólkaskúlanum kunnu fáa førleikaviðbót, um teir hava ískoytisútbúgvingar, men tær verða sjáldan latnar.

Tað sigur Jónleif Johannesen, næstformaður í Føroya Lærarafelag.

Í sáttmálanum hjá Føroya Lærarafelag stendur, at førleikaviðbót kann verða latin, men myndugleikarnir lesa hesa orðingina sum, at viðbót skal ikki verða latin, sigur Jónleif Johannesen á heimasíðuni hjá Lærarafelagnum.

Hann heldur, at fleiri lærarar hava ískoytisútbúgvingar, sum lúka krøvini til førleikaviðbót, millum annað serlærarar, lesivegleiðarar, skúlavegleiðarar og orðblindalærarar. Men teir fáa hana ikki. 

Lofta næmingum

Hesar ískoytiseftirútbúgvingarnar eru settar í verk fyri at lofta næmingum, ið hava ilt við at halda seg til nýggju avbjóðingarnar, ið fólkaskúlin gevur teimum. Og tað sendir neiligan boðskap, at lærararnar, sum taka hesar útbúgvingar og uppgávur á seg, ikki fáa viðbót, sigur Jónleif Johannesen. 

Hann heldur, at førleikaviðbótin hevði eggjað fólki enn meira at átaka sær hesar týdningarmiklu uppgávur, og vildi gjørt, at arbeiðið verður millum mest áhugaverdu postar í fólkaskúlanum. Við verandi skipan er vandi fyri, at eldsálirnar brenna út.  

30 fara undir útbúgving

Næsta skúlaár byrja umleið 30 lærarar á støddfrøði-vegleiðaraútbúgvingini. Jónleif Johannesen vísir á, at hesir lærarar áttu at verði knýttir at førleikastovunum kring landið, og at ein førleikaviðbót til lærarar hevði økt munandi um virðingina fyri serfakkunnleikanum.