Løgmaður ætlar at taka loyvini hjá Anitu aftur

Løgmaður ætlar sær at taka øll veiðu- og fiskiloyvi hjá garnaskipinum Anitu aftur.

Tað boðar hann frá í skrivi í dag.

Løgmaður ætlar at taka loyvini frá Anitu við heimild í grein 46, stk. 1 í løgtingslóg nummar 28 frá 10. mars 1994 um vinnuligan fiskiskap.

Hetta ætlar løgmaður at gera fyribils, til dómur er sagdur í revsimálinum móti Anitu. Áðrenn hendan avgerð verður tikin, hevur P/f Seta høvi til at seta fram síni sjónarmið sambært fyrisitingarlógini.

Reiðaríið hevur freist til mikudagin 3. september at koma við viðmerkingum til avgerðina hjá Løgmansskrivstovuni. Tá dómur er sagdur, verður málið um at taka aftur av veiði- og fiskiloyvi hjá Anitu tikið uppaftur til endaliga avgerð.