Grønland bíðar til næsta ár við Hoyvíkssáttmálanum

Grønland er ikki til reiðar at gerast partur í Hoyvíkssáttmálanum.

Føroyar og Ísland hava boðið Grønlandi við.

Men eftir ein fund í Reykjavíik í gjár segði Aleqa Hammond, landsstýrisforkvinna, at næsta ár, tá Hoyvíkssáttmálin verður tíggju ár, skal hann endurskoðast.

Tá verður lættari hjá Grønland at taka støðu, tí tá verður greitt, hvørjar royndir, Føroyar og Ísland hava av sáttmálanum.

Vinnan skal spyrjast

Íslendska kringvarpið hitti Alequ Hammond eftir fundin við Gunnar Braga Sveinsson, uttanríkisráðharra, og Kaj Leo Holm Johannesen, løgmann, í gjár.

Aleqa Hammond, landsstýrisforkvinna, segði eisini við íslendska kringvarpið, at grønlendska vinnan hevur brúk fyri samstarvi í Útnorðri.

Ivaleyst hugsa grønlendsk vinnulívsfólk øðrvísi nú um fríhandilssamstarv enn fyri tíggju árum síðani, tá Hoyvíkssáttmálin kom. 

Umráðandi er, at vinnan er við í viðgerðini í Grønlandi um Hoyvíkssáttmálan, sigur Aleqa Hammond.