Krevur búskaparviðurskiftini í Grønlandi á breddan

Tað hevur fingið øði í grønlendskar politikarar, at Danski fólkaflokkurin, saman við restini av andstøðuni í fólkatinginum, krevur eitt spurnarorðaskifti um búskaparligu støðuna í Grønlandi.

Framsøgumaðurin hjá Danska fólkaflokkinum í grønlendskum málum, Søren Espersen, sigur, at búskaparliga gongdin í Grønlandi er út av lagi, og tí mugu donsku politikararnir gera vart við seg.

Søren Espersen vísir á, at undirskotið á grønlendsku fíggjarlógini verður einar 700 milliónir kr. næstu árini, samstundis sum arbeiðsloysið veksur skjótt, og grønlendingar í hópatali flyta av landinum.

Finst at Alequ Hammond

Danski fólkaflokkurin vil hava at vita frá Helle Thorning-Schmidt, forsætisráðharra, hvat hon vil gera við Grønland og vánaligu gongdina har.

Søren Espersen finst eisini at grønlendsku landsstýrisforkvinnuni, Alequ Hammond, og skuldsetir hana og grønlendska landsstýrið fyri ikki at megna at gera nakað við vánaligu støðuna.

- Aleqa Hammond hevur ikki megnað at greitt frá, hvussu álvarslig støðan er í Grønlandi,og heldur ikki, hvussu landsstýrið ætlar at loysa álvarsligu støðuna í landinum, sigur Søren Espersen.