Framvegis eingin toskur á Føroya banka

Meira var at fáa av toski á Føroya banka í vár enn undanfarin vár. Spurningurin var so, um toskurin var í ferð við at koma fyri seg aftur. 

Men yvirlitstrolingin nú í heyst vísir, at tað neyvan er hent.

Magnus Heinason hevur júst verið á Føroya banka.

Niðurstøðan er, at framvegis er lítið at fáa av toski á Føroya banka. Lítið var eisini at fáa av hýsu, tó var nakað av smáari hýsu, og av upsa var sera lítið. 

Magakanningarnar vístu, at meira er til av bæði smáari og stórari nebbasild enn vanligt hevur verið seinastu árini.