Luktur frá eldgosi merkist í Noregi

Lukturin av svávul-dioxidi frá eldgosinum Holuhrauni í Íslandi merkist á norsku vesturstrondini, veit NRK at siga. 

Vesturstrondin í Noregi liggur 1.300 kilometrar frá Holuhrauni.

Veðurkonan, Vibeke Thynes, sigur við NRK, at lukturin mest sannlíkt stavar frá eldgosinum í Íslandi, men at svávul-dioxid'ið er ikki konsentrerað, og tí er eingin heilsuvandi.

Sambært Bjørn Sævar Einarsson á íslendsku veðurstovuni, vísa myndir frá fylgisveini týðiligt, at ein gass-rípa ferðast móti Noregi. 

Stórar nøgdir av svávul-dioxidi hava eisini verið skrásettar á eysturlandinum í Íslandi farnu dagarnar. Har hava fólk kært sína neyð, tí tey hava havt ilt í hálsinum, sviða í eygunum og høvuðpínu.

Íslendska umhvørvisstovan hevur gjørt eina heimasíðu, sum kunnar um dálkingarstøðuna í Íslandi, orsakað av eldgosinum. 

Konsentratiónin av svávul-dioxidi skal verða oman fyri 350 mikrogramm í ein heilan tíma, fyri at fara um markið fyri, hvat heilsumyndugleikarnir siga, er gott fyri heilsuna.