Vilja finna betri viðgerð fyri etingarólag

Annika Helgadóttir Davidsen, sum er ph.d.lesandi, og Marianne Engelbrecht Lau, ph.d.leiðari, arbeiða nú við at finna betri viðgerð til fólk, sum hava etingarólag.

Eitt serligt eyðkenni fyri viðgerð av etingarólagi er, at lutfalsliga nógvir sjúklingar gevast við viðgerðini, áðrenn hon er liðug. Hetta hevur við sær, at úrslitini eru verri, enn tey annars kundu verið.

Tær báðar eru farnar undir eina verkætlan, har tær m.a. kanna, um tað við bólkasamrøðum ber til at fáa fleiri sjúklingar at vera longur í viðgerð, og á tann hátt betra um úrslitini.

159 sjúklingar eru við í kanningini. Ætlanin er, at kanningin skal vera liðug við árslok í ár, og farið verður so undir at kanna úrslitini og gera niðurstøður.

Síðani verða sjúklingarnir eftirmettir trý ár seinni. Annika Helgadóttir Davidsen og Marianne Engelbrecht Lau arbeiða á Psykoterapeutisk Center Stolpegaard og á Psykologisk Institut á lærda háskúlanum í Keypmannahavn.