Aftur uppsagnir á Elektron

<p>Fimm fólk eru í dag søgd úr starvi, og tey hava arbeitt í leiðsluni og í fyrisitingini, umframt á virkisøkjum, har arbeiðsuppgávur eru horvnar ella umskipaðar, sigur leiðslan í fráboðan.</p>

<p>- Vit harmast um at siga dugnaligum fólki úr starvi, men tað er umráðandi, at vit skapa avlop til at tryggja, at Elektron mennist, sigur Kjartan Thomassen, stjóri í Elektron.</p>

<p>Eftir niðurskurðin eru 63 starvsfólk eftir á Elektron. Í januar í fjør vórðu 8 fólk søgd úr starvi, og í februar í ár fór Niels Christian Nolsøe frá sum stjóri.</p>

<p><strong>Menningin steðgaði</strong></p>

<p>Tá segði nevndarformaðurin, Súni Schwartz Jacobsen, at fyritøkan steðgaði við menningini av nýggjum forrætningsøkjum uttanlands, og at stjórin í hesum sambandi hevði ynskt at verða loystur úr starvi. Síðani hevur Kjartan Thomassen tikið við sum stjóri.</p>

<p>Elektron hevði næstan 20 milliónir krónur í halli í 2013. Hallið av vanliga rakstrinum var smáar tríggjar milliónir, meðan kostnaðarføringar, sum felagið kallar tað, gjørdu hallið til nærum 20 milliónir.</p>

<p>Við kostnaðarføringar meinar felagið við avskrivaðan goodwill, útreiðslur til størri verkætlanir og uppsagnarlønir. Sølan hjá felagnum minkaði 10 milliónir í 2013.</p>

<p>Landið og peningastovnarnir eiga Elektron, men seinastu árini hava peningastovnarnir flutt meginpartin av sínum KT-virksemi til útlendskar fyritøkur.</p>