Tjóðbankin ávarar móti framburðinum í Føroyum

Framburðurin í føroyska búskapinum kann koma Føroyum aftur um brekku, um landsstýrið ikki fremur neyðug tiltøk fyri at tryggja varandi góðan fíggjarstand.

Føroyar hava eins og onnur lond í Vesturheiminum eina stóra fíggjarliga avbjóðing, tí fleiri og fleiri eldri fólk vera í framtíðini og færri løntakarar fyri hvønn fólkapensjónist.

Ein óhollur fíggjarpolitikkur kann enda við, at kredittvirði, lánførið, versnar og rentan hækkar.

Tað er metingin hjá danska Tjóðbankanum um Føroyar fyri triðja ársfjórðingin 2014.

Arbeiða uttanlands

Nógvir føroyingar búgva í Føroyum men arbeiða uttanlands. Nú tað gongur betur í Føroyum kann trot gerast á arbeiðsmegi. 

Men gongdin er trupul at venda, tí føroyingar fáa betri løn uttanlands. Landsstýrið kann minka skattafyrimunirnar hjá teimum, sum arbeiða uttanlands, fyri at minka vandan fyri ovhiting í búskapinum og geva størri skattainntøkur í Føroyum.

Yvirskot valdast

Tjóðbankin útilokar ikki, at til ber at fáa hallið í fíggjarlógini burtur í 2016. Men yvirskot í 2016, tí uppsjóvarvinnan og alingin ganga so væl, er ikki tað sama sum at almenni fíggjarstandurin er góður. Tí eru onnur tiltøk neyðug.

Forskattaðu pensjónirnar geva nakað fyrstu árini, men tann inntøkan minkar sum frá líður, sigur Tjóðbankin í sínari greining.