Leiðarin fyri Secret Service loyst úr starvi

Mest umrødda málið er um 42 ára gamla Omar Gonzalez, sum 19. september ólógliga kom sær inn í Hvítu Húsini. Hann leyp upp um hegnið, rann tvørtur um grasvøllin og langt inn í bygningin. 

Gonzalez var ikki steðgaður fyrr enn hann hevði runnið gjøgnum gongina, sum gongur gjøgnum stóran part av fyrstu hædd í forsetabústaðnum. Hann hevði knív uppi á sær.

Trygdin vánalig

Umframt Gonzalez, eru tvey onnur mál eisini, sum avdúka vantandi mannagongdir innan trygd hjá Secret Service. 

Talsmaðurin hjá Hvítu Húsunum, Josh Earnest, sigur, at tað er Barack Obama sjálvur, sum sigur, at neyðugt er við nýggjari leiðslu fyri Secret Service.

Arvaði fleiri gølur

Áðrenn hon tók við starvinum, var Secret Service longu uppíblandað í gølur í sambandi við, at fleiri agentar hjá teimum, høvdu keypt kynsligar tænastur frá skøkjum, tá teir undan almennu vitjanini hjá Barack Obama, vitjaðu í Kolumbia. 

Í 2011 eydnaðist einum manni at lata sjey skot av móti Hvítu Húsunum. Ikki fyrr enn fleiri dagar seinni, gjørdist Secret Service varugt við tað.

Og í einum øðrum máli, vóru tríggir agentar, sum vóru við Barack Obama í Amsterdam, sendir heimaftur til USA, tí teir gingu fullir.

Fakta

Julia Pierson fekk stjórastarvið í mars í fjør, og hon var fyrsti kvinnuligi stjóri í trygdartænastuni. Frammanundan var hon starvsfólkaleiðari í Secret Service.

Í løtuni er Joseph Clancy virkandi stjóri fyri Secret Service.