Keyptu minni enn politikararnir roknaðu við

Fólk keyptu minni í fjør, enn landsstýrið og løgtingið væntaðu.

Meirvirðisgjaldið gav 155 mió. kr. minni í 2013 enn ásett var í fíggjarlógini. Landskassin fekk eina milliard og 165 milliónir krónur í meirvirðisgjaldi.

Fíggjarmálaráðið metti eisini skeivt, tá inntøkuskatturin var settur í fíggjarlógina. Landið fekk 56 milliónir krónur minni í skatti.

Fíggjarmálaráðið hevur staðfest, at skattainntøkurnar vóru ikki nóg neyvt mettar. 

Hóast virksemið í landinum vaks og bruttotjóðarúrtøkan vaks fimm prosent í fjør, vuksu lønirnar ikki lutfalsliga líka nógv. 

Allar inntøkur landskassans vóru tó ikki yvirmettar, onkur var undirmett.

Makrelur og sild góvu 32 mió. kr. meira. Ætlanin var at fáa 107 mió. kr. í tilfeingisgjaldi í landskassan. Tá avtornaði komu 139 milliónir í kassan.