Skulu verða betur fyrireikað til orðaskifti

Andstøðan í løgtinginum vil hjálpa tingfólkum at vera betur fyrireikað til orðaskiftini í tinginum.

Teir fýra flokkarnir, Framsókn, Javnaðarflokkurin, Sjálvstýrisflokkurin og Tjóðveldi vilja hava tingskipanina broytta, so tey, sum leggja fram uppskot, fáa fimm minuttir til at greiða frá uppskotinum, áðrenn framsøgufólkini fáa orðið, tá mál hevur fyrstu viðgerð.

Teksturin í uppskotum er minni enn so altíð so greiður, at hann einsamallur er nóg gott grundarlag undir sakligari viðgerð og støðutakan.

Hetta kann elva til nógvar misskiljingar í viðgerðini, og viðgerðin fer tí av kósini.

Og so leggja andtøðuflokkarnir afturat, at serliga er hetta galdandi, tá løgmaður ella landsstýrisfólk leggja uppskot fyri løgtingið, - tí landsstýrisfólkið ikki fær orðið fyrr enn eftir, at framsøgufólkini hjá øllum flokkum hava havt orðið.