Eingin pensjónsnýskipan í hesi tingsetuni

Samgongan ætlar, at pensjónsnýskipanin skal koma í gildi frá 1. januar næsta ár. Tað stendur í samgonguskjalinum, sum varð skrivað í november.

 

Og tað ætlar samgongan framvegis, skilst á lagnum. Men fleiri av neyðugu lógarbroytingunum verða ikki framdar fyrr enn í seinastu løtu, tí flestu uppskotini, sum eru knýtt at pensjónsnýskipanini, verða ikki løgd fyri tingið fyrr enn í heyst.

 

Bara eitt uppskot verður lagt fyri tingið í hesari tingsetuni, og tað kemur eftir, at framløgufreistin hjá løgtinginum er farin.

 

Tað er sjálvt høvuðsuppskotið - eftirlønarskattalógin - sum skal avloysa rentutryggingarlógina. Tað uppskotið ásetur millum annað, hvussu eftirlønin skal samansetast, hvussu inngjaldið hækkar stigvíst, og hvussu viðurskiftini verða hjá teimum, sum hava pensjónir uttanlands.

 

Atli Leo, aðalstjóri í Fíggjarmálaráðnum, sigur, at ein bólkur av embætisfólkum úr Fíggjarmálaráðnum og Taks hevur júst arbeitt við uppskotinum um pensjónsnýskipan, og landsstýrið fer nú at viðgera hesi tilmæli. Høvuðsuppskotið verður tískil ikki klárt at leggja fyri tingið, áðrenn freistin er farin, men ætlanin er at biðja um frávik frá framløgufreistini.

 

 

Tað var í mars mánaði í fjør, at táverandi samgonga, sum vóru Fólkaflokkurin, Sambandsflokkurin og Javnaðarflokkurin, legði pensjónsnýskipanina fyri tingið. 12 lógaruppskot vóru lunnar undir skipanini, men tey komu ikki úr aftur nevnd, og duttu tí burtur. 

 

Sambært pensjónsnýskipanini skulu øll spara 15 prosent upp av lønini til eftirløn, og at pensjónsveitingar verða gjørdar skattskyldugar. Ætlanin var upprunaliga, at skipanin skuldi koma í gildi 1. januar í ár, men tað varð útsett til 1. januar næsta ár.

 

Semja var ikki í politiska fylgibólkinum, sum varð knýttur at pensjónsnýskipanini. Millum annað helt andstøðan, at skipanin var ikki klár at leggja fyri tingið.

 

Tað eru Fíggjarmálaráðið og Almannamálaráðið, sum skulu gera lógaruppskotini til pensjónsnýskipanina. Hvussu nógv lógaruppskot, talan verður um, er ógreitt, tí tað veldst um, hvørjar broytingar samgongan ger í upprunaligu pensjónsnýskipanini, sigur Atli Leo, aðalstjóri í Fíggjarmálaráðnum. 

 

Freistin at leggja lógaruppskot fyri tingið í hesari tingsetuni er 7. mars, men uppskotini skulu verða tinginum í hendi í seinasta lagi í ovurmorgin, t.e. mikudagin.