Nógv koma framvegis í ALS

Hóast arbeiðsloysið er minni enn nakrantíð, koma nógv fólk framvegis í Arbeiðsloysisskipanina. 

Í fjør stovnaði ALS knappliga 2.000 arbeiðsleys, og higartil í ár eru fleiri enn 1.500 skrásett fyrstu ferð at vera arbeiðsleys.

Johan Dahl, landsstýrismaður, hevur svarað Bill Justinussen, løgtingsmanni, sum spurdi, hví lønarútreiðslurnar hjá Arbeiðsloysisskipanini eru meiri enn tvífaldaðar síðani 2009.

Í 2009 arbeiddu 17 fólk hjá ALS, í fjør vóru tey 32.

Lønirnar meira enn tvífaldaðar

Men lønirnar eru meira enn tvífaldaðar hesi fimm árini. Tær vóru 6,3 mió. kr. í 2009 og 15 mió. kr. í fjør.

Ein orsøk er, at virksemið hjá ALS er broytt og krevur nú fólk við hægri útbúgvingum. Tey fáa meira í løn enn skrivstovufólk. Og í 2013 rindaði ALS tvær stjóralønir, tí stjóraskifti var. 

Seinastu árini hevur verið trupult hjá ungum fólki at sleppa í læru. Tí hevur ALS tikið tríggjar lærlingar, hevur Johan Dahl fingið at vita frá ALS.